ដើម្បីចាប់ផ្ដើម សូមពិនិត្យមើល លក្ខខណ្ឌតម្រូវក្នុងការបោះឆ្នោត ដើម្បីដឹងថាតើអ្នកអាចនឹងត្រូវចុះឈ្មោះបោះឆ្នោតនៅក្នុងរដ្ឋកាលីហ័្វរញ៉ាឬទេ។
អ្នករស់នៅក្នុងរដ្ឋកាលីហ្វ័រញ៉ាត្រូវតែចុះឈ្មោះបោះឆ្នោតយ៉ាងហោចណាស់ 15 ថ្ងៃមុនថ្ងៃបោះឆ្នោត។ សម្រាប់កាលបរិច្ឆេទនេះ និងកាលបរិច្ឆេទផុតកំណត់បោះឆ្នោតសំខាន់ផ្សេងៗទៀត សូមចូលទៅកាន់ កាលបរិច្ឆេទ និងធនធានពាក់ព័ន្ធនឹងការបោះឆ្នោត។ ប្រសិនបើកាលបរិច្ឆេទផុតកំណត់ចុះឈ្មោះបានកន្លងហួសសម្រាប់ការបោះឆ្នោតនាពេលខាងមុខ នៅក្នុងការបោះឆ្នោតភាគច្រើនអ្នកអាចនឹងត្រូវធ្វើដំណើរទៅកាន់ការិយាល័យបោះឆ្នោតក្នុងខោនធីរបស់អ្នក មណ្ឌលបោះឆ្នោត ឬការិយាល័យសាខាដែលត្រូវបានចាត់តាំងដោយមន្ត្រីរៀបចំបោះឆ្នោតនៅក្នុងខោនធីរបស់អ្នក ក្នុងអំឡុងពេល 14 ថ្ងៃមុននិងរួមទាំងថ្ងៃបោះឆ្នោត ដើម្បីចុះឈ្មោះបោះឆ្នោតដោយមានលក្ខខណ្ឌ និងបោះឆ្នោតលើសន្លឹកឆ្នោតបណ្ដោះអាសន្ន។ ដំណើរការនេះត្រូវបានគេហៅថា ការចុះឈ្មោះបោះឆ្នោតនៅថ្ងៃតែមួយ។
នៅពេលអ្នកចុះឈ្មោះ អ្នកអាចនឹងបោះឆ្នោតនៅក្នុងការបោះឆ្នោតរដ្ឋ និងក្នុងតំបន់ទាំងអស់។ អ្នកនឹងមិនត្រូវការចុះឈ្មោះបោះឆ្នោតម្ដងទៀតទេ ប្រសិនបើអ្នកមិនផ្លាស់ប្ដូរឈ្មោះរបស់អ្នក ឬផ្លាស់ប្ដូរចំណូលចិត្តគណបក្សនយោបាយ។ ប្រសិនបើអ្នកផ្លាស់ទីលំនៅ អ្នកអាចធ្វើបច្ចុប្បន្នភាពអាសយដ្ឋានកន្លែងស្នាក់នៅក្នុងរដ្ឋកាលីហ្វ័រញ៉ារបស់អ្នកបាន ដោយការចុះឈ្មោះឡើងវិញតាមអ៊ីនធឺណិត ឬដោយដាក់បញ្ជូនពាក្យសុំចុះឈ្មោះអ្នកបោះឆ្នោតជាក្រដាស។
អ្នកក៏អាចផ្ញើលិខិតដែលមានចុះហត្ថលេខាទៅកាន់មន្ត្រីរៀបចំបោះឆ្នោតក្នុងខោនធីបច្ចុប្បន្នរបស់អ្នក ដែលប្រាប់គាត់អំពីការផ្លាស់ទីលំនៅរបស់អ្នក និងផ្ដល់ជូនគាត់នូវថ្ងៃខែឆ្នាំកំណើត និងអាសយដ្ឋានបច្ចុប្បន្នរបស់អ្នក ទោះបីជាអាសយដ្ឋាននោះស្ថិតនៅក្នុងខោនធីផ្សេងក៏ដោយ។ ប៉ុន្តែ ប្រសិនបើអ្នកបានធ្វើបច្ចុប្បន្នភាពអាសយដ្ឋានកន្លែងស្នាក់នៅរបស់អ្នករួចហើយនៅនាយកដ្ឋានយានយន្ត ឬសេវាប្រៃសណីយ៍សហរដ្ឋអាមេរិក ការចុះឈ្មោះរបស់អ្នកនឹងត្រូវបានធ្វើបច្ចុប្បន្នភាពដោយស្វ័យប្រវត្តិជាមួយនឹងអាសយដ្ឋានថ្មីរបស់អ្នក។
គុណសម្បត្តិសម្រាប់ការចុះឈ្មោះបោះឆ្នោត
ដើម្បីចុះឈ្មោះបោះឆ្នោតក្នុងរដ្ឋកាលីហ្វ័រញ៉ាបាន អ្នកត្រូវតែ៖
- ជាពលរដ្ឋសហរដ្ឋអាមេរិក និងអ្នកស្នាក់នៅក្នុងរដ្ឋកាលីហ័្វរញ៉ា (សម្រាប់ព័ត៌មានអំពីអ្នកបោះឆ្នោតនៅក្នុងយោធាឬនៅបរទេស សូមមើល អ្នកបោះឆ្នោតពីយោធានិងនៅបរទេស)
- មានអាយុចាប់ពី 18 ឆ្នាំឡើងទៅនៅថ្ងៃបោះឆ្នោត
- បច្ចុប្បន្នមិនកំពុងជាប់ពន្ធនាគាររដ្ឋ ឬសហព័ន្ធដោយការកាត់ទោសបទឧក្រិដ្ឋ (សម្រាប់ព័ត៌មានបន្ថែម សូមមើល សិទ្ធិបោះឆ្នោត៖ បុគ្គលដែលមានប្រវត្តិឧក្រិដ្ឋកម្ម) និង
- បច្ចុប្បន្នមិនត្រូវបានរកឃើញថាអសមត្ថភាពផ្លូវចិត្តក្នុងការបោះឆ្នោតដោយតុលាការនោះទេ (សម្រាប់ព័ត៌មានបន្ថែម សូមមើល សិទ្ធិបោះឆ្នោត៖ បុគ្គលដែលស្ថិតក្រោមការការពារ)។
គុណសម្បត្តិសម្រាប់ការចុះឈ្មោះបោះឆ្នោតទុកជាមុន
ដើម្បីចុះឈ្មោះបោះឆ្នោតទុកជាមុននៅក្នុងរដ្ឋកាលីហ្វ័រញ៉ា អ្នកត្រូវតែ៖
- មានអាយុ 16 ឬ 17 ឆ្នាំ ហើយ
- បំពេញគ្រប់លក្ខខណ្ឌមានសិទ្ធិផ្សេងៗក្នុងការបោះឆ្នោត។
អ្នកនឹងចុះឈ្មោះបោះឆ្នោតដោយស្វ័យប្រវត្តិនៅថ្ងៃខួបកំណើត 18 ឆ្នាំរបស់អ្នក។
តើអ្នកចុះឈ្មោះបោះឆ្នោតតាមកាលបរិច្ឆេទផុតកំណត់ដោយរបៀបណា?
- ចូលទៅកាន់ ការចុះឈ្មោះបោះឆ្នោតតាមអ៊ីនធឺណិត ដើម្បីបំពេញពាក្យសុំ ឬ
- ចុះឈ្មោះបោះឆ្នោតដោយប្រើប្រាស់ពាក្យសុំចុះឈ្មោះបោះឆ្នោតដោយក្រដាស។
ដើម្បីទទួលបានពាក្យសុំចុះឈ្មោះបោះឆ្នោតដោយក្រដាស
ប្រសិនបើអ្នកចង់ចុះឈ្មោះដោយប្រើប្រាស់ពាក្យសុំចុះឈ្មោះបោះឆ្នោតដោយក្រដាស អ្នកអាចទៅយកពាក្យសុំនៅការិយាល័យបោះឆ្នោតក្នុងខោនធីរបស់អ្នក បណ្ណាល័យ ការិយាល័យនៃនាយកដ្ឋានយានយន្ត ឬការិយាល័យប្រៃសណីយ៍សហរដ្ឋអាមេរិក។ គឺជាការសំខាន់ដែលពាក្យសុំចុះឈ្មោះបោះឆ្នោតរបស់អ្នកត្រូវបំពេញឱ្យបានពេញលេញ និងត្រូវវាយត្រាប្រៃសណីយ៍ ឬបញ្ជូនដោយផ្ទាល់ទៅកាន់ការិយាល័យបោះឆ្នោតក្នុងខោនធីរបស់អ្នកយ៉ាងហោចណាស់ 15 ថ្ងៃមុនពេលបោះឆ្នោត។
ដើម្បីស្នើសុំឱ្យមានការបញ្ជូនពាក្យសុំចុះឈ្មោះបោះឆ្នោតដោយក្រដាសទៅកាន់អ្នក សូមហៅទូរសព្ទទៅលេខ (800) 345-VOTE(8683) ឬផ្ញើអ៊ីមែលទៅកាន់បុគ្គលិកផ្នែកបោះឆ្នោត។
របៀបបំពេញកាតចុះឈ្មោះបោះឆ្នោត (PDF)
តើខ្ញុំនឹងកំណត់អត្តសញ្ញាណរបស់ខ្ញុំដោយរបៀបណា នៅពេលចុះឈ្មោះបោះឆ្នោត?
ពាក្យសុំចុះឈ្មោះបោះឆ្នោតស្នើសុំលេខបណ្ណបើកបរឬអត្តសញ្ញាណបណ្ណនៅរដ្ឋកាលីហ្វ័រញ៉ារបស់អ្នក ឬអ្នកអាចប្រើប្រាស់លេខបួនខ្ទង់ចុងក្រោយលើកាតសន្តិសុខសង្គមរបស់អ្នក។ ប្រសិនបើអ្នកមិនមានបណ្ណបើកបរ អត្តសញ្ញាណបណ្ណនៅរដ្ឋកាលីហ្វ័រញ៉ា ឬកាតសន្តិសុខសង្គម អ្នកអាចនឹងទុកចន្លោះនោះឱ្យនៅទទេ។ មន្ត្រីរៀបចំបោះឆ្នោតក្នុងខោនធីរបស់អ្នកនឹងផ្ដល់លេខមួយឱ្យអ្នកដែលនឹងត្រូវបានប្រើប្រាស់ដើម្បីកំណត់អត្តសញ្ញាណអ្នកថាជាអ្នកបោះឆ្នោត។
ពលរដ្ឋថ្មីៗ
ប្រសិនបើអ្នកនឹងក្លាយជាពលរដ្ឋសហរដ្ឋអាមេរិកតិចជាង 15 ថ្ងៃមុនពេលបោះឆ្នោតបន្ទាប់ អ្នកអាចនឹងនៅតែអាចចុះឈ្មោះនិងបោះឆ្នោតបាន។ ដើម្បីធ្វើដូច្នេះ អ្នកត្រូវតែធ្វើដំណើរទៅការិយាល័យបោះឆ្នោតក្នុងខោនធីរបស់អ្នកគ្រប់ពេលមុនពេលកន្លែងបោះឆ្នោតបិទនៅថ្ងៃបោះឆ្នោត។ អ្នកត្រូវតែយកទៅជាមួយនូវអំណះអំណាងថាអ្នកគឺជាពលរដ្ឋសហរដ្ឋអាមេរិក និងចុះហត្ថលេខាលើទម្រង់បែបបទដែលចែងថាអ្នកមានសិទ្ធិបោះឆ្នោតនៅក្នុងរដ្ឋកាលីហ្វ័រញ៉ា។ ឬសម្រាប់ព័ត៌មានបន្ថែម សូមមើលឯកសារណែនាំអំពីការបោះឆ្នោតសម្រាប់ពលរដ្ឋថ្មី (PDF)។ ទាក់ទង ការិយាល័យបោះឆ្នោតក្នុងខោនធីរបស់អ្នក សម្រាប់ព័ត៌មានបន្ថែម
ការចុះឈ្មោះបោះឆ្នោតនៅថ្ងៃតែមួយ (ការចុះឈ្មោះបោះឆ្នោតដោយមានលក្ខខណ្ឌ)
នៅក្នុងការបោះឆ្នោតដែលធ្វើឡើងដោយមន្ត្រីរៀបចំបោះឆ្នោតក្នុងខោនធីរបស់អ្នក អ្នកអាចចុះឈ្មោះក្រោម “លក្ខខណ្ឌ” និងបោះឆ្នោតនៅការិយាល័យបោះឆ្នោតក្នុងខោនធីរបស់អ្នក បន្ទាប់ពី 15 ថ្ងៃនៃកាលបរិច្ឆេទផុតកំណត់ចុះឈ្មោះបោះឆ្នោត។ សម្រាប់ព័ត៌មានបន្ថែម សូមចូលទៅកាន់ការចុះឈ្មោះបោះឆ្នោតនៅថ្ងៃតែមួយ។
និស្សិតមហាវិទ្យាល័យ និងអ្នកបោះឆ្នោតដែលរស់នៅបរទេស
ប្រសិនបើអ្នកគឺជាពលរដ្ឋកាលីហ្វ័រញ៉ាដែលរស់នៅឆ្ងាយពីផ្ទះ ខណៈពេលសិក្សានៅមហាវិទ្យាល័យ សាលាពាណិជ្ជកម្ម ឬសាលាបច្ចេកទេស ឬអ្នកបោះឆ្នោតដែលរស់នៅក្រៅសហរដ្ឋអាមេរិកបណ្ដោះអាសន្ន សូមមើលផ្នែក និស្សិតមហាវិទ្យាល័យ និងអ្នកបោះឆ្នោតដែលរស់នៅបរទេស។
តើអ្នកបានចុះឈ្មោះបោះឆ្នោតរួចហើយឬ?
ដើម្បីដឹងថាបច្ចុប្បន្នអ្នកបានចុះឈ្មោះបោះឆ្នោតរួចហើយឬនៅ សូមចូលទៅកាន់ផ្នែក ពិនិត្យមើលស្ថានភាពនៃការចុះឈ្មោះបោះឆ្នោតរបស់អ្នក។
ពេលដែលត្រូវចុះឈ្មោះបោះឆ្នោតឡើងវិញ
ចុះឈ្មោះបោះឆ្នោតឡើងវិញ នៅពេល៖
- អ្នកផ្លាស់ប្ដូរអាសយដ្ឋានកន្លែងស្នាក់នៅ ឬអាសយដ្ឋានផ្ញើសំបុត្ររបស់អ្នក
- អ្នកផ្លាស់ប្ដូរឈ្មោះរបស់អ្នក ឬ
- អ្នកផ្លាស់ប្ដូរជម្រើសគណបក្សនយោបាយរបស់អ្នក។
ក្នុងនាមជាអ្នកបោះឆ្នោតនៅកាលីហ្វ័រញ៉ា សូមដឹងថាការបោះឆ្នោតក្នុងតំបន់នៅក្នុងតំបន់មួយចំនួនត្រូវបានធ្វើឡើងនៅកាលបរិច្ឆេទដែលមិនស្របនឹងកាលបរិច្ឆេទបោះឆ្នោតទូទាំងរដ្ឋទេ។ ការបិទរយៈពេល 15 ថ្ងៃនៃកាលបរិច្ឆេទផុតកំណត់ចុះឈ្មោះសម្រាប់ការបោះឆ្នោតក្នុងតំបន់ទាំងនេះប្រែប្រួលអាស្រ័យលើកាលបរិច្ឆេទជាក់ស្ដែងនៃការបោះឆ្នោត។ ប្រសិនបើអ្នកត្រូវការដឹងកាលបរិច្ឆេទផុតកំណត់សម្រាប់ការបោះឆ្នោតក្នុងតំបន់ សូមទាក់ទងមន្ត្រីរៀបចំបោះឆ្នោតក្នុងខោនធីរបស់អ្នក ឬចូលទៅកាន់ផ្នែក ការបោះឆ្នោតដែលមានការគ្រប់គ្រងក្នុងខោនធី។
របៀបលុបចោលការចុះឈ្មោះរបស់ខ្ញុំ
ប្រសិនបើបច្ចុប្បន្នអ្នកបានចុះឈ្មោះបោះឆ្នោតនៅក្នុងរដ្ឋកាលីហ្វ័រញ៉ា ហើយចង់លុបចោលការចុះឈ្មោះបោះឆ្នោតរបស់អ្នក អ្នកអាចបំពេញទម្រង់បែបបទស្នើសុំលុបចោលការចុះឈ្មោះបោះឆ្នោតនៅក្នុងរដ្ឋកាលីហ្វ័រញ៉ា (PDF) រួចដាក់បញ្ជូនទម្រង់បែបបទនោះទៅកាន់ការិយាល័យបោះឆ្នោតក្នុងខោនធីរបស់អ្នក។ ប្រសិនបើអ្នកមានសំណួរ អ្នកអាចទាក់ទងមន្ត្រីរៀបចំបោះឆ្នោតក្នុងខោនធីរបស់អ្នក ឬលេខទូរសព្ទអ្នកបោះឆ្នោតរបស់រដ្ឋលេខាធិការតាមរយៈលេខ (800) 345-VOTE (8683)។
